Azərbaycan milli komandasının kapitanı Emin Mahmudov Qazaxıstana qarşı yoldaşlıq oyundan öncə mətbuat konfransında iştirak edib.

Offsideplus.az xəbər verir ki, 32 yaşlı yarımmüdafiəçi jurnalistlərin suallarını cavablandırıb:

- Sabah bizi yaxşı rəqibə qarşı oyun gözləyir. Qazaxıstan millisi müdafiədə və əks-hücumda yaxşı oyanyır. Son illərdə inkişaf ediblər. Qazaxıstan yaxşı millidir. İki il əvvəl olduğu kimi yaxşı oynayaraq qalib gəlmək istəyirik.

- Sabah qol vursan, Qurban Qurbanovun rekorduna çatacaqsan. Bu haqda düşünmüsən?

- Neçə oyundur eyni vəziyyətdir, bir qol vurub çata bilərəm. Mən daha çox milli komanda haqda düşünürəm. Komanda yaxşı olsa, epizodlarım çox olar, qol vura bilərəm. Sırf qolu fikirləşmirəm.

- Millinin yeni baş məşqçisi yaxın günlərdə açıqlanacaq. Arif Əsədovun sabah son oyunu ola bilər. Kapitan olaraq futbolçularla söhbət etmisiz ki, Arif müəllimə qələbə hədiyyə edəsiz?

- Biz istəyirik ki, qələbə qazanaq. Bura millidir, hər oyuna qələbə üçün çıxmalıyıq. Arif müəllim haqda nə düşünürlər, bilmirik. İstəyirik ki, qalib gələk, azarkeşləri və Arif müəllimi sevinirək.